Binali Yıldırım İspaniyağa kitte

Ul Törkiyä – İspaniya xökümätlärarası altıncı sammitında qatnaşa

Binali Yıldırım İspaniyağa kitte

Törkiyä xökümäte räise Binali Yıldırım Madridqa kitte. Ul Törkiyä – İspaniya xökümätlärarası altıncı sammitında qatnaşa. Binali Yıldırım bu säfärneñ iq’tisadıy yaqtan ähämiyätenä basım yasıy. “İspaniya belän mönäsäbätlärne alğa cibärü öçen qayber kileşülär imzalanaçaq,”-dide ul.  Xökümät räise kitär aldınnan Äsänboğa aêroportında jurnalistlar belän oçraştı.

İspaniya belän Törkiyä xökümätläre arasındağı sammit 2008nçe yılda tözelde. Berençe cıyılış 2009da ütkärelde. Soñğısı 2014nçe yılda Törkiyädä uzğan ide.

Yıldırım bu säfär qısalarında xezmättäşe Mariano Raxoy belän ike il arasındağı mönäsäbätlärneñ bügengesen häm kiläçägen här yaqlap telgä alaçaqların belderde. “İspaniya belän Törkiyä strategik urtaq. Ber ük waqıtta NATOda berlektäşlär. Törle mädäniyät, törle millätlärgä tüzemlelek kürsätüçe ike il 2005nçe yılda Mädäniyätlär İttifaqına da bergä citäkçelek itte,”-dip söyläde xökümät räise.

Yıldırım bu säfärdä iq’tisad temasının da çittä qalmayaçağın belderde. İke il arasındağı säwdä äyläneşe uzğan yıl 19%qa artıp, 13 milliard dollar täşkil itkän. İspaniyanıñ yözlärçä şirkäte Törkiyägä investiśiya kertä. Şuña kürä, xökümät räiseneñ êşmäkärlär belän oçraşuı da kötelä.

Binali Yıldırımnı İspaniya patşası 6nçı Felipe dä qabul itäçäk. Monnan tış, İspaniya wäkillär palatası räise Ana Pastor belän oçraşu planlaştırılğan.         

Süriyädäge krizis başlanğannan birle İspaniya Törkiyäneñ hawa saqlanu sistemasına aktiv räweştä yärdäm itä. Xökümät başlığı duslıqnıñ awır waqıtlardağı ähämiyäten dä bilgeläp ütte. 2 yıldır ispannarnıñ raketaları Törkiyä kük yözeneñ tınıçlığın täêmin itä.



Bäyläneşle xäbärlär