Törkiyädä Ali Aqış iskä alındı

Yazuçı häm jurnalist Ali Aqış tuuınıñ 100 yıllığında İskeşähärdä iskä alındı

Törkiyädä Ali Aqış iskä alındı

Törkiyäneñ İskeşähär qalasında tanılğan cämäğät êşleklese, Bötendönya tatar ligasınıñ berençe qoruçı başlığı, ädip häm yazuçı Ğayaz İsxaqineñ warisçısı, yazuçı häm jurnalist Ali Aqışqa 100 yıl tulu mönäsäbäte belän iskä alu kiçäse ütkärelde.

İskeşähär tatar cämğiyäte, Bötendönya tatar ligası häm İskeşähär Törek uçaqları oyıştırğan çarada tanılğan cämäğät êşleklese, ğalim Sadri Maqsudineñ onığı yazuçı Gönül Pultar, mäşhür tyurkolog häm mongoloid professor Äxmät Timerneñ qızı Bahşayiş Timer Fıratoğlu, Tatarstannıñ Törkiyädäge tulı wäqalätle wäkile urınbasarı Al’bert Yalışev häm wäkilçelek kiñäşçese Haqan Coşkun da qatnaştı.

Tatar cämğiyäte wäkilläre häm Ali Aqışnı iskä alu çarasına kilgän qunaqlar belän Qazan tatarları muzeyı urnaşqan Odunpazarı (utın bazarı) rayonı başlığı, çığışı belän qırım tatarı bulğan Kazım Kurt küreşep söyläşte. Oçraşu waqıtında şuşındıy çaralarnıñ yışraq ütkärelüe teläge belderelde.

İskeşähär Qazan tatarları cämğiyäte başlığı Rawza Mällä häm urınbasarı Muhsin Bänäklitaş kilgän qunaqlarğa cämğiyät êşçänlege häm şähärdäge tatarlar turında mäğlümat birde, qazan tatarları muzeyın gizderde.

Bötendönya tatar ligası başlığı, ğalimä häm yazuçı Gönül Pultar Ali Aqışnıñ tormışın häm êşçänlegen tanıtqan kiçädä Ali Aqış belän bäyle videoyazma täqdim itelde.

Kiçä barışında olı şäxesneñ Änkaradağı 94 yäş’lek bertuğan señlese Säidä Aqış ta telefon aşa üz fikerlären citkerde.

“İskeşähär Törek uçağı” cämğiyäteneñ konferenśiya zalında uzdırılğan iskä alu kiçäsendä çığış yasawçı professor doktor Nädim Ünal isä, kiçägä kilgän xalıqqa räxmätlären citkerep, “Törek uçağı” cämğiyätenä nigez saluçılardan berseneñ mäşhür tatar ğalime Yosıf Aqçura buluın xäterlätep, mondıy cıyınnarnıñ möhimlegenä häm zarurlığına basım yasadı.

Muhsin Bänäklitaş fotosüräte



Bäyläneşle xäbärlär