Germaniyä Könçığış Gutada höcümnärne tuqtatırğa çaqıra

“Astana oçraşuında Könçığış Gutada atışnı tuqtatu garantiyäse birgän Rusiyä qayda, İran qayda dip sorarğa kiräk"

Germaniyä Könçığış Gutada höcümnärne tuqtatırğa çaqıra

Germaniya Könçığış Gutadağı keşe üterülärne tuqtatu öçen Rusiyä häm İrannı Bäşşar Äsäd rejimı östendäge yoğıntısın qullanıp basım yasarğa çaqırdı. Germaniya xökümäte süzçese Steffen Zaybert Berlinda jurnalistlarğa Süriyä belän bäyle belderülär citkerde. “Äsäd rejimınıñ Könçığış Gutadağı soñğı höcümnäre terrorçılarğa tügel, üz xalqına qarşı. Barı tik ike köndä, aralarında xatın-qız häm balalar da şaqtıy bulğan, yözlärçä keşe ülde, yözlärçä keşe yaralandı”,-dide ul. Zaybert bombalaw öçen xastaxanä häm başqa mediśina üzäkläreneñ maqsat itep alınuına iğ’tibarnı yünältä. “Dimäşk tiräsendä yäşäwçe yaqınça 400 meñ keşe dähşät êçendä. Andağı rejim töbäktäge baş kütärüçelärne tulısınça yuq itärgä teli häm şunıñ  öçen xalıqqa azıq-tölek häm mediśina yärdäme cibärügä härdaim kirtä quya. Berläşkän Millätlär oyışmasınıñ böten tırışlıqlarına qaramastan, rejim bu xärbi strategiyanı böten wäxşilege belän däwam itä häm här törle säyäsi çişeleşkä qarşı kilä”, - dip söyläde süzçe. Süriyädäge üterülärgä çik quyu öçen Steffen Zaybert  Rusiyä häm İranğa çaqıru yasıy: “Astana oçraşuında Könçığış Gutada atışnı tuqtatu garantiyäse birgän Rusiyä qayda, İran qayda dip sorarğa kiräk. Bu ike ölkäneñ yärdäme bulmasa, Äsäd rejimı xärbi mäs’älädä bu qadär köçle bulmas ide.”  



Bäyläneşle xäbärlär